لو قولنالك إيه رأيك.. تحب تدرس كورس.. “خيال علمي”؟
وللا كورس “ذكاء اصطناعي”؟
أو تدرس “علم نفس” على إيد دكاترة أجانب؟
أو كورس عن “الإستدامة البيئية”، أو “صناعة الألعاب”؟
إيه ده إيه ده.. هي الحاجات دي موجودة في مصر!!!
في الوطن العربي!!
الكورسات دي وأكتر منها موجوده في أكبر موقع للتعلم الإلكتروني هو موقع Coursera
موقع “كورسيرا” بيعتمد على تقديم دورات تدريبية Courses مش بيعتمد على التعليم بنظام السنوات أو التيرم
هتلاقيهم مقسمين الكورسات -أكتر من 100 كورس متنوع موجود حالياً- لـ 16 تصنيف:
بين الأحياء وعلوم الحاسب والإقتصاد والرياضيات والطب والصيدلة
وإدارة الأعمال والتعليم والعلوم الإنسانية والتاريخ والهندسة والفيزياء والتكنولوجيا
الكورسات دي اللي بيقدمها أساتذة ودكاتره من أفضل الجامعات في العالم.. هم حاليا 16 جامعة
مابين جامعة ستانفورد وميتشجان و داك وجامعة إدنبرج وكالتك “اللي بيشتغل فيها دكتور أحمد زويل و د. عصام حجي” 
وجامعة واشنطن و فيرجينيا و تورونتو.. كل جامعة بتقدم كورس أو مجموعة كورسات
طب نظام الكورسات دي إيه؟
انت بتختار التصنيف Category اللي انت مهتم بيه.. أو تشوف الكورسات الموجودة كلها، أو بالضغط على لوجو الجامعة بتقدر تشوف الكورسات اللي هي بتقدمها
وتختار الكورس اللي انت عاوز تدرسه، وتعرف التفاصيل بتاعته:
“هيبدأ امته. وعدد ساعات الدراسة. مين هيقدمه. تفاصيل منهج الكورس والإمتحانات…”
وبمجرد ماتسجل فيه Sign-Up هم هيتواصلوا معاك مع بداية موعد الكورس، وممكن تدرس كورس تم بالفعل.
طب إيه مميزات الكورس نفسه أو هو عامل إزاي؟
- الكورس بيكون عبارة عن دروس فيديو متقسمه على عدد دقائق.. يعني الإسبوع الواحد ممكن يبقى فيه 4 أو 5 دروس، مدة الدرس الواحد بين 10 لـ 25 دقيقة.
- الفيديو نفسه بيكون جواه أسئلة وانت تجاوب عليها.. بحيث تصحصح وانت بتتفرج 
- الفيديو كمان فيه ميزة caption الوصف اللي بيتقال في الفيديو، يعني لو الدكتور بيشرح بالإنجليزي، ممكن تختار Caption اللغة الإنجليزية.. كده هتبقى شايفه وبتسمعه، وكمان شايف الكلام مكتوب قصادك.
- في الفيديو كمان ميزة تسريع أو تبطيئ الكلام.. بحيث تختار الطريقة اللي تناسبك وتقدر تحصّل بيها المعلومات بشكل كويس.
- الكورس بيكون متاح معاه المادة التدريبية Materials العروض التقديمية والوصف اللي في الفيديو.
- بالإضافة إلى إن أغلب الكورسات بيكون فيها تعليم تفاعلي.. بمعنى انه بيوديك زيارات خارجية “طبعاً انت بتشوفها وانت مكانك وده حسب نوع الكورس” أو يورريك نماذج Maquette شرح ومصادر تعليمية
وده حسب نوع الكورس” أو يورريك نماذج Maquette شرح ومصادر تعليمية
بحيث تستوعب المادة بشكل أفضل، وكمان منتدى للأسئلة والنقاش مع الطلبة اللي بيحضروا الكورس والأساتذة ولقاءات معهم في بعض الأحيان.
- بيكون فيه Quizzes وامتحانات وطبعاً لو التزمت بمواعيد المنهج بتاخد شهادة من الجامعة اللي قدمت الكورس “حسب طبيعة كل كورس”.
وطبعاً كل الكورسات بتتقدم على موقع Coursera.org بالمجان.. زي مابتقول مؤسِسة الموقع وهي أستاذ علوم الحاسب بجامعة ستانفورد.:
ربما يكون هناك شاب في أفريقيا.. “أينشتاين” جديد أو “بيل جيتس” آخر، ولكنه لايجد فرصة للتعليم في تلك الجامعات، نحن نتيح له تلك الفرصة.
هاااا.. لسه شايف إن فيه عقبات قصادك عشان تتعلم اللي انت بتحبه! لو نويت بجد تدرس اونلاين على كورسيرا.. قوللنا اخترت أي كورس تبدأ بيه؟
المصدر
المصدر
